قال الرئيس عبد الفتاح السيسى، موجها حديثه لوزير الاتصالات الدكتور عمرو طلعت: “يعني أنت يا دكتور جيت على الحكومة والجهد اللي اتعمل فيها والبنية الأساسية اللي اتكلفتها، سواء كان البنية الأساسية داخل كل وزارة أو بين الوزارات ومراكز البيانات المؤمنة، دا اتكلف كام الأولاني؟ الانتقال للعاصمة الإدارية الجديدة، الميكنة بتاعتها، بديك فرصة تقوله، الناس متصورة، كلكم صورتوا وخدتوا الفيلم بتاع المباني من برة”.
مؤتمر حكاية وطن
وأضاف خلال جلسات مؤتمر “حكاية وطن”: “ماحدش دخل جوا وصورلي الناس بتشتغل إزاي وبتعمل إيه، الموضوع دا مهم أوي عشان عاوزين نقول للناس، بيانات الحكومة المصرية، ودا قليل من الدول اللي عملت دا، عملت حاجة مغلقة، واشتغلنا بقالنا خمس سنين عليه ولا يمكن حد يقدر يدخل على الحكومة يعمل لها شلل، هو دا سر؟ هو حد هيقدر يعمل حاجة بعد اللي عملناه إن شاء الله”.
وتابع الرئيس السيسي: “الناس متصورة لما إحنا بنقول الدولة بتدار بشكل متقدم تتجاوز به الإشكاليات بتاعة الجهاز الإداري للدولة من خلال النظم الحديثة، وكل كلمة بتقولوها هنا بتتحول لجهد وتكلفة مالية ضخمة، مراكز البيانات دي أنشأت بشكل محصن بمليارات الجنيهات، بتكلم في الإنشاء خرسانة مش قواعد بيانات ولا سيرفرات جبتوها، عشان تحقق لكم عمل مغلق محكم مؤمن لا يستطيع أحد يخش عليكم في أي وقت مهما كانت قدراته، لأن مقلتوش الخمسين ألف حاسب الموجودين في الوزارات عبارة عن شاشة وكيبورد، لا يمكن لمخلوق يقدر يدخل”.