كشف رجل الأعمال المهندس نجيب ساويرس عن رأيه في المقولة التي تقول إن هناك سقفًا محددًا للثروة وهو 50 أو 100 مليون دولار، ومن بعدها لا تفرق الأموال كثيرًا، مؤكدًا أنه يؤمن بهذا الرأي.
اختلاف بسيط بين المليارات
وقال ساويرس، خلال بودكاست «قصص»: «بلاش نخش في الـ50 والـ100 مليون، نفترض إن عندك شخصًا عنده مليار دولار وشخصًا ثانيًا عنده 10 مليارات دولار، هتلاقي إن ما فيش أي اختلاف في حياتهم، الشخص أبو مليار دولار عنده طيارة خاصة، والشخص أبو 10 عنده طيارة خاصة، الشخص أبو مليار دولار عنده يخت، وده عنده يخت، ده عنده شقة حلوة قوي في كل حتة، وده عنده شقة».
الرضا سر السعادة
وأضاف ساويرس: «ده معناه إيه؟ إن الإنسان لازم يبقى راضي وما يبصش إنه عايز زيادة، أنا بالنسبة لي أي مال زيادة ببص له إنه هيديني فرصة أعمل خير أكتر، إنما في حياتي الخاصة الحقيقة ما عنديش متطلبات، عندي عربيتين مش لازم يكون عندي أربع عربيات، ما أنا مش هركبهم الاتنين في نفس الوقت، عندي شقة في كل بلد، طب ما أنا مش محتاج شقتين في كل بلد، يعني احتياجات الإنسان بتخلص بعد مدة معينة، ممكن بـ100 مليون ممكن بمليار!».
المال وسيلة للخير
وتابع ساويرس: «المال الكتير بينفع في الخير، أنا دايمًا ضميري بيأنبني وأنا ماشي مثلًا في مصر وألاقي أحياء فقيرة وناس مش لاقية تسكن كويس، أيوه إحنا بنساهم في إن ده ينتهي بالمؤسسة بتاعتنا، بس المؤسسة بتاعتنا بتعمل نقطة في بحر، لو عندك مال أكتر هتقدر تزود الأعداد اللي ممكن تساعدها».